Чорабинии тантанавӣ бахшида ба ҷашни 27-солагии Истиқлолияти давлатии Ҷумҳурии Тоҷикистон

7 сентябр дар маҷлисгоҳи Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба ҷашни 27-солагии Истиқлолияти давлатии Ҷумҳурии Тоҷикистон чорабинии тантанавӣ баргузор гардид.

Муовини  Раиси Кумита Саидумрон Абдураҳмонзода матни сухани табрикотии Раиси Кумитаро бахшида ба ин ҷашни муқаддастарини давлатӣ қироат намуда, зимнан тамоми кормандону мутахассисони соҳа, собиқадорон, табиатдӯстон ва ҳамаи онҳоеро, ки дар тозаву озода нигоҳ доштани  муҳити зист ва истифодаи оқилонаи  захираҳои табиат ҳиссагузоранд, табрику муборакбод намуд.

Хоссатан қайд карда шуд, ки Истиқлолияти давлатӣ таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  имкониятҳои зиёдеро барои рушди мустақилонаи давлат, иқтисодиёту иҷтимоиёт, маънавиёту фарҳанги миллат фароҳам овард ва дар тамоми соҳаҳои ҳаёти мамлакат, аз ҷумла дар соҳаи ҳифзи муҳити зист пешравиҳои назаррас таъмин гаштанд. Мардуми шарифу сарбаланди Тоҷикистон бо тамоми ҳастӣ дарк менамоянд, ки Истиқлолият муқаддастарину азизтарин неъмати дунё, рукни асосии давлати озод, рамзи шарафу номуси ватандорӣ  ва нерӯи таконбахши ҳаёти ҳаррӯзаи мо мебошад.

Дар чорабинӣ ба муносибати ҷашни 27-солагии Истиқлолияти давлатии Ҷумҳурии Тоҷикистон 21 нафар кормандон бо фармоиши Раиси Кумита барои ноил шудан ба натиҷаҳои хуби меҳнатӣ дар татбиқи сиёсати давлатии ҳифзи муҳити зист ва мавқеи фаъоли ҷамъиятӣ бо нишони сарисинагии «Корманди фахрии ҳифзи муҳити зист» ва 84 нафар кормандони дигар бо нишони 30-солагии таъсисёбии мақомоти ҳифзи муҳити зист қадрдонӣ карда шуданд. 

Ҳамчунин, тибқи фармоиши Раиси Кумита аз 28 августи соли 2018, №108 19 нафар кормандони воситаҳои ахбори оммаи ҷумҳурӣ, ки дар озмуни Кумита дар доираи оғози Даҳсолаи байналмилалии амал «Об барои рушди устувор, 2018-2028» ва бахшида ба эълон гардидани соли 2018 ҳамчун «Соли рушди сайёҳӣ ва ҳунарҳои мардумӣ» таҳти мавзӯи «Табиати Тоҷикистон макони сайёҳӣ» ғолиб дониста шуда буданд, бо ифтихорномаҳои дараҷаи 1, 2, 3, инчунин ба ифтихорномаҳои ҳавасмандӣ ва мукофотҳои пулӣ сарфароз гардонида шуданд.