Татбиқи қарори Раиси вилояти Суғд ҷиҳати ҳифз ва нигаҳдории захираҳои моҳӣ

Баҳри дар амал татбиқ намудани қарори Раиси вилояти Суғд аз 23 августи соли 2018, №365 «Дар бораи пешбурди масъалаҳои ҳифз, парвариши сунъӣ ва такрористеҳсолии захираҳои моҳӣ дар вилояти Суғд» аз тарафи нозирони давлатии шӯъбаи назорати давлатии истифода ва ҳифзи олами набототу ҳайвонот ва захираҳои моҳии Раёсати ҳифзи муҳити зист чораҳои зарурӣ андешида шуда истодаанд.

Бо ин мақсад 29 августи соли ҷорӣ дар маҷлисгоҳи ҶСК «Моҳипарвари Гулистон» дар шаҳри Гулистон бо иштироки 30 нафар моҳидорони ин коргоҳ ва ҶСК «Моҳии Тоҷик» аз тарафи намояндагони Раёсат вохӯрӣ ташкил карда шуда, ҷиҳати дар амал татбиқ намудани қарори мазкур корҳои фаҳмондадиҳӣ гузаронида шуд.

Рӯзҳои 29 – 31 августи соли ҷорӣ аз тарафи нозирони Раёсат дар минтақаи Шӯркӯли ноҳияи Б. Ғафуров фаъолияти моҳидорони ҶСК «Моҳипарвари Гулистон»-и шаҳри Гулистон, дар минтақаҳои «Баҳри Тоҷик»-и шаҳри Конибодом фаъолияти моҳидорони ҶСК «Моҳипарвари Гулистон» ва ҶСК «Моҳии Тоҷик», ки бо сайди саноатии моҳии молӣ машғуланд аз назар гузаронида шуда, барои дар фаъолияти худ истифода бурдани тӯрҳои стандартии капронии моҳигирӣ бо тамғаи корхона ва навиштаҷоти махсус пешниҳодҳо дода шуд.

Ҳамчунин, аз тарафи нозирон санҷишҳои ихтиологии моҳиҳои навсайдшуда аз назар гузаронида шуда, санадҳои сайди саноатии моҳӣ тартиб дода шуд.

Раёсати ҳифзи муҳити зист вилояти Суғд рафти иҷрои қарори мазкурро зери назорати доимӣ гирифта, баҳри дар амал татбиқ шудани  он корбарӣ менамояд.